കവിത
അതിജീവനം
ദീപ സന്തോഷ്
അങ്ങുദൂരെ...
പുകമറച്ച പകലിനുമപ്പുറം
കറുത്തചക്രവാളത്തിനൊത്തനടുക്ക്
ഒരൊറ്റബിന്ദുവിൽനിന്നകത്തേക്ക്
സൂചിക്കുഴപോലിടുങ്ങിയ
കഴുത്തിലൂടൂർന്നിറങ്ങിയാൽമാത്രം
കാണാവുന്നൊരുവെളിച്ചമുണ്ട്....
കുതിച്ചുയർന്നും,കിതപ്പാറ്റിയും
ഉറ്റുനോക്കുന്നവരാൽ മാത്രം
കണ്ടെത്താനാവുന്നൊരു തീക്ഷ്ണത്തിളക്കം....
അതിനുള്ളിലൊരു പതിഞ്ഞ ശ്വാസത്തിൽ
സാന്നിദ്ധ്യമറിയിച്ചിടാനായ് മാത്രം
അതിജീവനത്തിൻ്റെ ദുസ്സഹമിടിപ്പുകൾ
മറന്നെത്തി നിൽക്കുന്ന ജീവൻ്റെ
കണ്ണിൽ
ആശ്വാസമോ, ഭീതിയോ കലർന്നൊരു
നോട്ടം പുരട്ടി വെച്ചിരിക്കുന്നു...
അതേ...
ആ നോട്ടത്തിന്റെ പേര്
അതിജീവനം എന്നു തന്നെയാണ്
No comments:
Post a Comment