കവിത
വി.ടി.ജയദേവന്‍
അങ്ങനെയായതുകൊണ്ട്
കൊടുങ്കാറ്റുകളും
ഭൂമികുലുക്കങ്ങളും ഉണ്ടാകും.
സംഭവിക്കാനുള്ളതൊക്കെ സംഭവിക്കും.
രോഗവും മാരണവും സംഭവിക്കും.
വരാനുള്ളവര്‍ വരും.
പോകാനുള്ളവര്‍ പോകും.
വിപ്ലവങ്ങളും
പ്രതിവിപ്ലവങ്ങളും നടക്കും.
സ്വേച്ഛാധിപതികള്‍ നമ്മെ
കോണ്‍സന്‍ട്രേഷന്‍ ക്യാമ്പിലിട്ട്
ചുട്ടുകൊല്ലും.
നമ്മുടെ മക്കള്‍
അവരുടെ ശവങ്ങളില്‍ തൂറും.
ചെകുത്താന്‍മാരും ദൈവങ്ങളും
ജീവിതം ഊഴംവെച്ചു കൈക്കലാക്കും.
സിദ്ധാന്തങ്ങളും
പ്രത്യയശാസ്ത്രങ്ങളും
പിറന്നാളുണ്ണികളെപ്പോലെ
കുളികഴിഞ്ഞ് കോടിയുടുത്തു വരും.
ആളുകള്‍ പരസ്പരം തല്ലുകൂടും,
കെട്ടിപ്പിടിക്കും.
പിന്നെയും പിണങ്ങിയെന്നും
പിന്നെയും പിരിഞ്ഞു എന്നും വരും,
കാലങ്ങള്‍ ഉദിക്കുകയും
അസ്തമിക്കുകയുംചെയ്യും,
വാ,
നമുക്കിപ്പോള്‍
ഇടവഴിയിലെ കരിയിലകള്‍ അടിച്ചുകൂട്ടാം
 |
| Add caption |
No comments:
Post a Comment