സംഗമം
.
ജ്യോതിരാജ് തെക്കൂട്ട്
ചില പോരാട്ടങ്ങളുണ്ട്
കണ്ണും ,കണ്ണും തമ്മിൽ
മനസ്സും, മനസ്സും തമ്മിൽ
കരളും, കരളും തമ്മിൽ
ഇതിലേതായിരിക്കാം
ചിത്രങ്ങൾ കോറിയ
പച്ചില പടർപ്പുകളിൽ
ഏകാകിയായി തപിക്കുന്നത് .
പ്രണയത്തിൻ്റെ തോടിനുള്ളിലേക്ക്
വികാരങ്ങളെ വിറക്കൊള്ളിക്കുന്നത്.
ജീവിത സരണിയിലൂടെ
കൂട്ടം തെറ്റി യോടുന്ന കാട്ടുകുതിരകളെ
സ്മരണയുടെ കൊടും വനത്തിൽ
അനുസ്യൂതമായി തളച്ചിടുന്നത്.
രാവിൻ്റെ ഉന്മാദ സ്ഥലികളിൽ
കിനാ പന്തങ്ങൾ കത്തിക്കുന്നത്
ഇളം നിലാവ്
ഹൃദയത്തിൽ നിന്നൂറി വന്നാണ്
പ്രണയത്തെ കുളിപ്പിച്ചെടുക്കുന്നത്.
പ്രണയ ഭിക്ഷുക്കൾ
കണ്ണിലും മനസ്സിലും കരളിലും
പേറ്റുനോവ് തറച്ചവരായിരിക്കും.
രാവെന്നോ പകലെന്നോ പേരില്ലാതെ
ധ്യാന നിമഗ്നമായൊരു തോണി
നോവിലൂടെയും വേവിലൂടെയും
സംഗമത്തിൻ്റെ വേരുകൾ തേടി
ജലാശയങ്ങളിൽ അലയുകയാണിപ്പോൾ.
No comments:
Post a Comment