ഓർമ്മച്ചിരാതുകൾ സതീഷ് അയ്യർ

കവിഭാഷ ഓൺലൈൻ

ഓർമ്മച്ചിരാതുകൾ

സതീഷ് അയ്യർ

മനം 
ഓർമ്മകൾ
ഒഴുകുമൊരു പുഴ

ഈറൻച്ചാറ്റലിൽ കുളിരും കാറ്റുമായ് 

പാടവരമ്പിലോടിക്കളിച്ചൊരാ ബാല്യം

മഴവില്ലിൻ വർണ്ണങ്ങളെണ്ണുന്ന നേരം

പിന്നെയും വന്നൊരാ മഴനനഞ്ഞോടുന്ന കാലം...

പാടത്തിനക്കരെ മിന്നൽ ചിരിക്കേ..

ചെവി പൊത്തിയമ്മതൻ
പിന്നിൽ മറഞ്ഞു കരഞ്ഞ ബാല്യം...!!

ഓർമ്മകൾക്കുള്ളിലും ആരോടും പറയാത്ത

ചെറു ചെറു രഹസ്യങ്ങളേറെയുണ്ട്...!!

ഇന്നും മായാതെ

ഓർത്തോർത്തിരിക്കുവാൻ

ആ വർണ്ണ ചിത്രങ്ങൾ കൂട്ടിനുണ്ട്...!!

തുമ്പിതൻ വാലിന്റെ തുമ്പിൽ പിടിച്ചു

കുഞ്ഞൻകല്ലുകൾ കൂട്ടിക്കളിച്ചനേരം...

കൈവിട്ടു പോകാതെയാ വാലിൽ
നൂലുകുരുക്കിപ്പറത്തി
കുസൃതിയോടോടി എത്രദൂരം...!!

ഓട്ടം പിഴച്ചു

കാലിലെ പെരുവിരൽ നഖം പൊട്ടിച്ചോരവാർന്നതും..

ഞൊണ്ടിക്കളിച്ചു നടക്കുന്ന കാലം 

കൂട്ടുകാർ കളിയാക്കി പിന്നാലെ വന്നതും...!!

കോടിയില്ലാതോണം കണ്ണീരാൽ വരവേറ്റതും...

സദ്യയില്ലാതോണം തൂശനിലയിലുണ്ടതും..

കൈനീട്ടം കല്ലുതുട്ടാൽ 

സങ്കൽപ്പ കൂട്ടർക്ക് പകുത്തതും...

പുത്തനുടുപ്പിന്റെ ഗന്ധവും പേറി
കൂട്ടുകാരെത്തി കടന്നുപോകെ...

ഇല്ലായ്മ മറയ്ക്കുവാനമ്മ 

വാഗ്ദാനക്കെട്ടു നിറയ്ക്കുന്നു മക്കളിൽ...!!

ഉള്ളിലെ തീക്കനൽ വെളിയിൽ മറയ്ക്കുവാൻ

മൗന വാത്മീകത്തിനുള്ളിലൊളിച്ചിരിക്കുന്നച്ഛൻ...!!

ഓർമ്മയിലിന്നും 

സങ്കടനോവായ് ,

ഒളിഞ്ഞു വിതുമ്പുന്നൊരായിരമുണ്മയാം രഹസ്യങ്ങൾ...!!

കൈവിടാനാകില്ല മറവിയ്ക്കുപോലും

അത്രമേലിഷ്ടമാ ബാല്യവും
നൊമ്പരമേറുന്ന ചിത്രങ്ങളും...!!

                                    https://www.blogger.com/blog/posts/3147672121396187900