എത്രയും പ്രിയപ്പെട്ട ജൂൺ
✍️✍️ധന്യ മനോജ്✍️✍️
അടഞ്ഞ വാതായനങ്ങൾ കൊഞ്ഞനം
കുത്തിക്കൊണ്ട് ,
അവധിയുടെ അറ്റമില്ലാപ്പാത
ദയനീയമായി പകച്ചു നിൽക്കുന്നു...
ചുവരുകൾ വർണ്ണവരകൾ ഇല്ലാതെ
വെള്ളെഴുത്തുവന്ന വാർദ്ധക്യകോലമായ്
അടർന്നുവീഴാൻ കാത്തു നിൽക്കുന്നു...
മൺതരികൾ പിഞ്ചുകാലുകളുടെ
സ്പർശനസുഖം കാത്ത്
വൃഥാ പ്രതീക്ഷതൻ ജാലകക്കമ്പികൾ
ഇറുകെ പിടിച്ച് ദൂരെയ്ക് കണ്ണുംനട്ടിരിക്കുന്നു...
പൊടിപറ്റിയ ബെഞ്ചിലെ പളകപ്പാളികൾ
പെൻസിൽ കുത്തലുകളും വരകളും തലോടി
ഓർമ്മതൻ തീർത്ഥം പാനം ചെയ്ത്
മിഴികളിൽ ഗതകാല സ്മൃതികൾ ഒളിപ്പിച്ച്
പഴകിയ ചോക്കിൻ പൊടി ഗന്ധം
നാസാരന്ധ്രങ്ങളിലേക്ക് വലിച്ചെടുക്കുന്നു..
നരവീണ കറുമ്പൻ എഴുത്തുപ്രതലങ്ങൾ
ആളൊഴിഞ്ഞ കല്ലറയുടെ
കാവൽഭടൻ കണക്കെ
യുദ്ധമില്ലാത്ത അക്ഷരഭൂവിൽ
ഏകനായ് പടവെട്ടിനൊരുങ്ങുന്നു..
വർണ്ണക്കൊടികളും കൊടിതോരണങ്ങളും
കുഞ്ഞൻവൈറസിനെ അറച്ച് ,
തിരിഞ്ഞും മറഞ്ഞും
വൈക്കോൽപെട്ടികൾക്കുള്ളിൽ
ശ്വാസംമുട്ടി പിടയുന്നു...
അക്ഷരച്ചെപ്പ് അടഞ്ഞുകിടക്കുന്നു...
കൈവെള്ളയിൽ ഇറുകെ പിടിച്ച
ഫോണിൽ നിന്നും പുറത്തു പ്രതിഫലിക്കുന്ന
അട്ടഹാസവും അഹങ്കാരവും കേട്ട്
ശലഭങ്ങൾ ദളങ്ങൾക്കുള്ളിൽ
ശ്വാസം പിടിച്ച് ഒളിച്ചിരിക്കുന്നു...
വിചിത്ര ചിത്രങ്ങളിൽ
വരച്ച കലണ്ടർ ദിനങ്ങൾ
ചരിത്രവാതിലുകൾകൊട്ടിയടച്ച്
വഴിതെറ്റി നീങ്ങുന്നു..
പ്രവേശ ഗാനങ്ങളോടൊത്ത്
പാടാൻ കൊതിച്ച കിളികൾ
സംഗീതമുപേക്ഷിച്ച് പറന്നകലുന്നു...
പ്രിയ ജൂണേ...,
നിരാശയല്ല പ്രത്യാശയാണ്
നിന്നുടെയുള്ളിൽ കോരി നിറക്കേണ്ടത്
അതിജീവനത്തിനായ് പണിയിച്ച
താഴിൻ്റെ ഉറപ്പു പരിശോധനയിൽ
നീ വിജയിച്ചിരിക്കുന്നു....
അക്ഷരങ്ങളും പാഠഭാഗങ്ങളും
ചാനൽച്ചില്ലകളിൽ ചേക്കേറുമ്പോൾ
കരുതലിൻ്റെ താക്കോൽക്കൂട്ടമായി
നീ കാവലിരിക്കുക ...
നിറങ്ങളും സ്വപ്നങ്ങളും നിനക്കായ്
പുതിയ പുലരിയായി ജന്മമെടുക്കും....തീർച്ച
5 comments:
നല്ല ഭാഷ. നല്ല എഴുത്തു. സാഹിത്യ മേഖലയിൽ ഇനിയും മുന്നേറാൻ സാധിക്കട്ടെ
Dhanya dear..You are a versatile writer..I love your writing style.
All the wishes from a true friend
മനോഹരം
തുടരുക ഈ എഴുത്തിൻ്റെ മനോഹര വഴികൾ
Proud of u my dear sister
Post a Comment